Friday, September 30, 2011

सखी

आनंद उवाच........................

सखीला सांगतो मी मनातल्या गोष्टी ,
काही उघड , काही लपलेल्या,
हिशोब देतो त्या मोहाच्या क्षणांचा ,
काही धरलेल्या , काही सोडलेल्या,

सखीशी उघडतो, स्वप्ने मनातली,
काही अस्फुट, काही भंगलेली,
काही भावनेत भिजुन विझलेली,
काही आशेत मनसोक्त रंगलेली,

सखीशी आहे एक अतुट बंधन,
अनवट नाजुक क्षणांनी सांधलेले,
अभंग अनादी अनंतश्या,
सुख दु:खाच्या दोऱ्याने बांधलेले,

दिशाहीन भरकटलेल्या तारुस माझ्या ,
असतो फक्त सखीचाच किनारा,
असहाय्यश्या , हताशलेला मनाला,
सखीच असते मनाचा ध्रुव तारा..........................

Thursday, September 29, 2011

तुझी अबोली


आनंद उवाच..................

तुझी अबोली
बाभुळ वाटे
जगण्यावर या
काळमेघ दाटे

तुझी अबोली
फक्त एकांत
प्रत्येक क्षण
वाटे युगांत

तुझी अबोली
राग धुमसता
मम मनाचा
छ्ळवाद नुसता

तुझी अबोली
दिशाहीन वारा
खग्रास ग्रहणी
सुर्यचंद्रतारा

तुझी अबोली
कधी फुलणार?
झोपाळ्यावाचुन
कधी झुलणार???